रंगः एक नमिल्दो कविता

व्यथाले च्यापेर

चिच्याउदै बितेकी सुत्केरीको 

जीउको रंग कस्तो हुन्छ ?

स्याहार नपाएर

बादी आईमाईले मृत जन्माएकी

बाउ थाहानभएको बच्चाको रंग कस्तो हुन्छ ?

भर्खरै ढुन्मुन्निदै भट्टीबाट निस्किएका

एकहुल नेताजीहरुको आखाको रंग कस्तो छ ?

कस्तो छ

यो देशका मजदुरहरुको 

आखामुनिको छालाको रंग ?

हातमा उठेको ठेलाको रंग के हो ?

के हो पसिनाको रंग ?

उसो त लालीगुरासको पो रंग कस्तो हुन्छ होला ?

त्यै गुरास शिरमा सिउरेकी 

नवयौवनाको गालाको रंग चै कस्तो हुन्छ ?

कस्तो हुन्छ सिन्दुरको रंग ?

त्यै सिन्दुर उजाडिएकी 

बिधवाको कलेटी ओठहरुले 

गाउने गीतको रंग चै के हो ?

कस्तो छ 

हामीले हर दिन देख्ने गरेको सपनाको रंग ?

कस्तो छ हाम्रोे ह्रृदयको रंग ?

किन कसैले मलाई उत्तर दिदैन ?

कि कस्तो हुन्छ

शहीदहरुको रगतको रंग ?

अथवा एकाविहानै 

सेतो नं प्लेटको गाडीले 

सडकबिच मारेको 

भुस्याहा कुकुरको रगतको रंग कस्तो थियो ?

धन्य हामी सबैलाई थाहा छ,

हाम्रोे देशको झन्डाको

भित्ताभरि पोतिएको रंग रातो छ ।

र नीलो छ

हाम्रोे झन्डाको किनार ।