सपनाको रंग

किन मेरो मात्रै हातको घडीमा

उल्टो उल्टो चलिरहन्छ जिन्दगीको समय ?

कसैले त भनोस् मलाई

कि कस्तो हुन्छ समयको रंग ?

 

उड्दैउड्दै बिद्यालय गएका चराजस्ता नानीहरु

फर्कि आउँछन् उदासउदास अनुहार लिएर

कस्तो हुन्छ होला तिनीहरुले हरेक दिन

स्कूलबाट झोलाभरिभरि बोकेर फर्कने कखराको रंग ?

कस्तो हुन्छ उमेरको रंग ?

उमेरसँगै बिलाईगएका

कल्कलाउदा बैशका रहरहरुको रंग पो कस्तो हुन्छ ?

आनो हराईरहेको छोरो फर्किआउने गोरेटोमा

आँखा बिछ्याईरहेका

बृद्ध बाको आँखामुनिको छालाकोरंग के हो ?

उसो त लालीगुँरासको पो रंग कस्तो हुन्छ होला ?

त्यै गुँरास शिरमा सिउरेकी

नवयौवनाको गालाको रंग चैकस्तो हुन्छ ?

कस्तो हुन्छ सिन्दुर उजाडिएकी

विधवाको कलेटी ओठहरुले

गाउने गीतको रंग ?

अनि हामीले हर दिन देख्ने गरेको सपनाको रंग चै?

कोही त भनिदेउ मलाई कि कस्तो छ हाम्रो हृदयको रंग ?

भर्खरै ढुन्मुनिदै भट्टीबाट निस्किएका

एक हुल नेताजीहरुको आँखाको रंग चै कस्तो छ ?

किन कसैले मलाई उत्तर दिँदैन हँ ?

कि कस्तो हुन्छ

हराएका सपनाहरुको रंग ?

धन्य, हामी सबैलाई थाहा छ,

हाम्रो देशको झण्डाको

भित्ताभरि पोतिएको रंग रातो छ

र नीलो छ

हाम्रो झण्डाको किनार ।

This poem was used in Drama "Aadha Satya", A theatrical play based on Disappeared During People's Revolution. 

You can find the Full Script over Here : 

https://ia802807.us.archive.org/28/items/reflectionweb/Aadha%20Satya%20Nepali.pdf